الشعب المصري مختوم على قفاه حسب تصريح جريدة الدستور ،واللي ختمه على قفاه هو نظام مبارك ،وده لأنه نظام استبدادي إجرامي ابن كلب ،ومع ذلك بيدعي إنه نظام ديمقراطي وفير وزي الفل ،والشعب المصري رغم ما يتعرض له من إذلال وإفقار وإهانة وكل اللي يخطر على بالك ،عامل ودن من طين وودن من عجين ،وعامل إنه مش واخد باله ،يعني القوانين تتفصل على شان تنهب آخر مليم في جيبه ،يقول ما يهمش ،الناس تموت بكل الوسائل يقوم يقولك قضاء وقدر ،الأسعار تنزل في جميع أنحاء العالم وتزيد في مصر لوحدها دوناً عن خلق الله ،يقولك ما جراش حاجة ،والناس أعذار علشان كده هو شعب مختوم مع سبق الإصرار والترصد ،كل انتخابات يزوّروا إرادته ويجيبوا عالم لا دين ولا ملة وشكلهم والعياذ بالله شبه إبليس وهو قايم من النوم يقوم الشعب المصري يقول قولته المشهورة على لسان زينب في رائعة محمد حسين هيكل : اللي ما لوش أهل الحكومة أهله عايزين دليل بعد كده إيه إن ده شعب مختوم ،وما يستهلش غير حسني مبارك يحكمه بالحديد والنار ،والغريب إن ده حاله منذ فجر التاريخ وخد عندك أمثلة فاجرة تؤكد إن الشعب المصري مختوم باقتدار في مطلع القرن التاسع عشر وبعد الشعب المصري ما طرد الفرنسيين من مصر وكمان أجبر السلطان العثماني على خلع الوالي الظالم خورشيد باشا ،تفتق ذهن زعمائه إنهم يجيبوا محمد على وده راجل ألباني بصمجي لا بيعرف يقرا ولا يكتب وكان بيتاجر في الدخان ودخل الجيش العثماني بمحض الصدفة قام المصريين جابوه والي عليهم بمزاجهم علشان يربيهم ويعلمهم الأدب بعد كده ،يعني المصريين ما لقيوش واحدمنهم يصلح لحكمهم فجابوا واحد ألباني على أساس إنه هيوفر للشعب المصري منتجات الألبان ...ما علينا يبقى مختوم ولاّ لأ مختوم تمام الموقف التاني عمله المعلم أحمد عرابي الجيش والشعب خرج وراه قام حضرته راح يستجدي واحد اسمه توفيق لا يساوي في سوق الرجال تعريفه مخرومة وهو كان كده فعلا أيوه زي ما أنت فهمت والقنصل الإنجليزي يتدخل ويلبسوه العمه ويقلوظوها جامد وينتهي الأمر باحتلال مصر ،طيب يا ناصح ما كنت قبضت عليه وحاكمته بتهمة العمالة ورميته في السجن وأعلنت نفسك حاكم على مصر وساعتها كان السلطان زفت الطين قالك ماشي وهو كان هيعمل إيه يعني ،الموضوع ما جاش على باله لا هو ولا حد من اللي معاه ،يبقى مختوم ولاّ لأ مختوم ماشي لسه في موقفين تانيين هأكتب عنهم بعدين ........مساؤه ختم يا باشا